Abeed Azad

🔻കൊറിയൻ സിനിമകളിൽ എൻ്റെ ഇഷ്ടചിത്രങ്ങളുടെ ലിസ്റ്റ് എടുത്താൽ ആദ്യ അഞ്ചിൽ ഇടം പിടിക്കുന്ന ഒന്നാണ് 'Miracle In Cell No.7'. എന്റെ മാത്രമല്ല പലരുടെയും കാര്യം അങ്ങനെ തന്നെ. പല റീമേക്കുകളും ഇറങ്ങിയിട്ടുണ്ടെന്ന് കേട്ടിട്ടുണ്ടെങ്കിലും യാദൃശ്ചികമായാണ് Netflixൽ ഈ തുർക്കിഷ് റീമേക്ക് കാണാനിടയായത്.

Year : 2019
Run Time : 2h 12min

🔻ഒരു പോലീസ് മേധാവിയുടെ മകളുടെ കൊലപാതകത്തിന് പ്രതിയായി ആരോപിക്കപ്പെടുകയും തുടർന്ന് ജയിലിൽ പോവേണ്ടി വരികയും ചെയ്ത മെമോയും അദ്ധേഹത്തിന്റെ ആറ് വയസ്സുകാരി മകൾ ഓവയും തമ്മിലുള്ള ആത്മബന്ധമാണ് ചിത്രത്തിന്റെ ആത്മാവ്. കൊറിയൻ സിനിമയെ അടിമുടി ഒപ്പി വെക്കുന്നതിന് പകരം കാതലായ മാറ്റങ്ങൾ വരുത്തിയിടത്താണ് ഒരു തരത്തിൽ ഒറിജിനലിനേക്കാൾ ചിത്രം ആസ്വദിക്കാനായത്. അതിന് പല കാരണങ്ങൾ ഉണ്ട്.

🔻മെമോയും ഓവയും തമ്മിലുള്ള ബന്ധത്തിന്റെ ദൃഢത തന്നെയാണ് സിനിമയുടെ നട്ടെല്ല്. അത്ര ഗംഭീരമായി അത് സമർത്ഥിച്ചെടുക്കുന്നതിൽ സംവിധായകൻ പൂർണ്ണമായി വിജയിച്ചിട്ടുണ്ട്. വൈകാരിയകമായ രംഗങ്ങളൊക്കെ നമ്മുടെ ആത്മാവിനെ തൊട്ടറിയാൻ പാകത്തിന് ചിത്രീകരിച്ചിരിക്കുന്നത് കാണാം സംവിധായകൻ. കൂടെയുള്ള കഥാപാത്രങ്ങൾക്ക് പോലും അവരുടേതായ ഗ്രൗണ്ട് ഒരുക്കുന്നതിലും സിനിമ മികച്ച് നിൽക്കുന്നുണ്ട്. കണ്ണ് നിറയാൻ പാകത്തിന് കേന്ദ്രകഥാപാത്രങ്ങളുടെ നിസ്സഹായതയിൽ നമ്മെ ചൂഷണം ചെയ്യുന്നതിലും സിനിമക്ക് നൂറിൽ നൂറ് മാർക്കും കൊടുക്കാം.

🔻കൊറിയൻ സിനിമയിൽ നിന്നുള്ള മാറ്റങ്ങൾ പ്രധാനമായും ജയിൽ അന്തരീക്ഷം ഒരുക്കുന്നതിൽ പ്രകടമാണ്. തുർക്കിയിലെ ജയിലുകൾ ഇപ്രകാരമാണോ എന്നറിയില്ല, എങ്കിലും അത്യാവശ്യം വിശ്വസനീയമായിത്തന്നെ അവ കൈകാര്യം ചെയ്തിട്ടുണ്ട്. ക്ലൈമാക്സിലും വലിയ തോതിലുള്ള മാറ്റങ്ങൾ കാണാം. ലോജിക് എന്നത് ഒരു കടമ്പയായി നിൽക്കുമ്പോഴും അതിനെ കൂസാതെ ആസ്വദിക്കാൻ തന്നെയാണ് മനസ്സ് പറഞ്ഞതും. അതുകൊണ്ട് തന്നെ തൃപ്തി തന്നെയായിരുന്നു പര്യവസാനവും നൽകിയത്.

🔻തുർക്കിഷ് സിനിമകളിൽ ഡിഫോൾട്ടായ വശ്യത നിറഞ്ഞ ഛായാഗ്രഹണവും പശ്ചാത്തലസംഗീതവും ഇതിലും കാണാം. കണ്ണഞ്ചിപ്പിക്കുന്ന ദൃശ്യങ്ങളും മനോഹരമായ കളർ ടോണുകളും ഗംഭീര പ്രകടനങ്ങളും കേൾക്കാൻ ഇമ്പമേറുന്ന പശ്ചാത്തലസംഗീതവുമെല്ലാം മുൻ മാതൃകയെ കവച്ചുവെക്കാൻ പോന്നതാണ്. ഒരുപക്ഷെ കൊറിയൻ സിനിമയേക്കാൾ മികച്ചത് എന്ന് തോന്നാൻ പ്രേരിപ്പിച്ച ഘടകങ്ങളും ഇവയൊക്കെത്തന്നെയാവും.ടെക്നിക്കലി വളരെ സമ്പന്നമായ ഒന്നായി മാറുന്നുണ്ട് ഈ ചിത്രം.

🔻ＦＩＮＡＬ ＶＥＲＤＩＣＴ🔻

കൊറിയൻ സിനിമയെ പൂർണ്ണമായി മറന്നുകൊണ്ട് ഈ ചിത്രം കാണാൻ ശ്രമിക്കുക. മികച്ച അനുഭവം തന്നെയാവും എന്ന കാര്യത്തിൽ സംശയമില്ല. കൊറിയൻ മാതൃകയെക്കാൾ പല കാരണങ്ങൾ കൊണ്ടും ഇഷ്ടപ്പെട്ട ഒന്നായി ഈ ചിത്രം മാറിയപ്പോൾ തുർക്കിഷ് സിനിമകൾ വീണ്ടും വീണ്ടും മനസ്സിലിടം നേടുന്ന ശീലം തുടർന്നുകൊണ്ടേയിരിക്കുന്നു. തീർച്ചയായും കണ്ടുനോക്കുക. സ്വയം വിലയിരുത്തുക.

ＡＢ ＲＡＴＥＳ ★★★★☆

ചിത്രം Netflixലും ടെലിഗ്രാം ചാനലിലും ലഭ്യമാണ്. Abi Suggests

🔻12 വർഷം മുമ്പ് ഒന്നും പറയാതെ ഷാമിലിന്റെ വീട്ടിൽ നിന്ന് ഇറങ്ങിപ്പോയതാണ് മകൻ ഗാബിൽ. ഭാര്യയെ വാപ്പയോടൊപ്പം വീട്ടിൽ ഉപേക്ഷിച്ച് പോയശേഷം അവരെങ്ങനെയാണ് ജീവിക്കുന്നതെന്ന് പോലും തിരക്കാണ് ഗാബിൽ കൂട്ടാക്കിയിട്ടില്ല. എന്നാൽ 12 വർഷങ്ങൾക്കിപ്പുറം ഒരു രാത്രി തന്റെ അനാർ തോട്ടങ്ങൾക്കിടയിലൂടെ മകൻ ഗാബിൽ നടന്നുകയറുന്നത് കണ്ടപ്പോൾ ഏതൊരു പിതാവും ചെയുന്നത് പോലെ അദ്ദേഹവും ഗാബിലിനെ സ്നേഹപൂർവ്വം വീട്ടിലേക്ക് ക്ഷണിച്ചു. സ്വന്തം മകളെ പോലെ കരുതുന്ന ഗാബിളിന്റെ ഭാര്യ സാറക്കും മകൻ ജലാലിനും കൂട്ടാവുമെന്ന പ്രതീക്ഷയോടെ..

Year : 2017
Run Time : 1h 30min

🔻12 വർഷം തങ്ങൾ അനുഭവിച്ച യാതനകളും മുറിപ്പാടുകളും പതിയെ മായ്ക്കാനുള്ള ശ്രമം കൂടിയായിരുന്നു ഗാബിലിന്റെ ഭാഗത്ത് നിന്നുണ്ടായത്. ഭാര്യയേയും മകനെയും വേണ്ടിവന്നാൽ വാപ്പയെയും റഷ്യയിലേക്ക് കൊണ്ടുപോവുകയാണ് ആ വരവിന്റെ ഉദ്ദേശ്യം. എന്നാൽ തന്റെ അനാർ തോട്ടങ്ങൾ വിട്ട് പോരാൻ ഷാമിൽ കൂട്ടാക്കാത്തതോടെ പ്രതിസന്ധിയിലായത് മകൻ ജലാലിന്റെ കാര്യം കൂടിയാണ്. വാപ്പുപ്പയെ വിട്ട് തൻ വരില്ലെന്ന് കടുപ്പിച്ച് പറഞ്ഞ 12 വയസ്സുകാരൻ ജലാലിന്റെ മുന്നിൽ ഗാബിൽ പതറിപ്പോവുകയാണ്. പേരിന് മാത്രം വാപ്പയെന്ന ലേബൽ ജലാൽ തനിക്ക് ചാർത്തിത്തരുമ്പോഴും സ്വന്തം മകനോട് എങ്ങനെ പെരുമാറണമെന്ന് അറിയാതെ ഗാബിൽ കുഴഞ്ഞുനിൽക്കുന്നത് കാണാം. ഒരു ഡ്രാമയെന്ന നിലയിൽ ചിത്രം നമ്മോട് അടുക്കുന്നത് ആ ഘട്ടം മുതൽക്കാണ്.

🔻അതിമനോഹരമായ ഫ്രെയിമുകൾ കഥ പറയുന്ന ചിത്രമാണ് Pomegranate Orchard. വിളഞ്ഞ്‌നിൽക്കുന്ന മാതളങ്ങൾ നിറഞ്ഞ തോട്ടങ്ങളിലൂടെ പലപ്പോഴും വൈഡ് ഷോട്ടിലും ക്ലോസ്സ് ഷോട്ടിലുമൊക്കെ കഥാപാത്രങ്ങൾ സംവദിക്കുന്നത് കാണാം. കഥയുടെ ഭൂരിഭാഗവും അരങ്ങേറുന്നത് തന്നെ തോട്ടങ്ങൾക്കിടയിലാണ്. അവർ തങ്ങളുടെ ജീവിതത്തിന്റെ സിംഹഭാഗവും ജീവിച്ച് തീർത്തതും ആ തോട്ടങ്ങൾക്കിടയിലാണ്. അപാരമായ Visual Beauty അനുഭവിച്ചറിയാം ഛായാഗ്രഹണമികവിലൂടെ. ഒപ്പം അഭിനേതാക്കളുടെ ഗംഭീര പ്രകടനങ്ങളും. അവസാനരംഗങ്ങളൊക്കെ വേറൊരു തലത്തിലേക്ക് ഉയർത്തുന്നതിന് അവയൊക്കെ സഹായിച്ചിട്ടുണ്ട്.

🔻ＦＩＮＡＬ ＶＥＲＤＩＣＴ🔻

 ജീവസ്സുറ്റ കഥാപാത്രങ്ങൾ കൊണ്ട് നമ്മുടെ മനസ്സിനെ നേരിയ തോതിൽ വൃണപ്പെടുത്തി ഒടുങ്ങുന്ന മികച്ചൊരു ഡ്രാമയാണ് Pomegranate Orchard. ബന്ധങ്ങളുടെ ദൃഢത സുന്ദരമായി മനസ്സിലാക്കിത്തരുന്ന രംഗങ്ങൾ കൊണ്ടും സ്നേഹത്തിന്റെ ഭാഷ്യമായി മാറുന്ന കഥാപാത്രങ്ങൾ കൊണ്ടും മനസ്സ് സന്തോഷപൂരിതമാവുമ്പോഴും ഒടുക്കം ഒരു തീരാനോവ് തന്നെ അവശേഷിപ്പിക്കുന്നു ചിത്രം. തന്റെ ജനാലകൾക്കിടയിലൂടെ അനാർ തോട്ടത്തിലേക്ക് നോക്കിനിൽക്കുന്ന ഷാമിലിന്റെ കലങ്ങിയ കണ്ണുകൾ തന്നെയാണ് നമ്മുടെ ദൃഷ്ടിയിലും ഉണ്ടാവുക. തീർച്ചയായും കാണുക ഈ ഫാമിലി ഡ്രാമ.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻യുദ്ധം ഒരു രാജ്യത്ത് പ്രത്യക്ഷത്തിൽ ഉണ്ടാക്കുന്ന മുറിവുകളേക്കാൾ അവിടുത്തെ പൗരന്മാരിൽ കോറിയിടുന്ന പരോക്ഷമായ മുറിവുകളാണ് ഉണങ്ങാൻ കാഠിന്യമേറിയത്. അവരുടെ ജീവിതം തന്നെ തുലാസിലാടുന്ന നിമിഷങ്ങളിലൂടെ ജീവിക്കേണ്ടി വരുമ്പോൾ ഭീതിയൊഴിവാകുന്ന നിമിഷങ്ങളിലേക്ക് ഏകപ്പെടാൻ പ്രതീക്ഷിക്കുന്നതിനുമപ്പുറം സമയമെടുത്തേക്കും. പുരുഷന്മാരേക്കാളേറെ സ്ത്രീകളെയും കുട്ടികളെയും അത് ബാധിക്കുകയും ചെയ്യും. അത്തരത്തിൽ ഒരു സ്ത്രീയുടെ കഥയാണ് Halima's Path മുന്നോട്ട് വെക്കുന്നത്.

Year : 2012
Run Time : 1h 37min

🔻ബോസ്നിയയും സെർബിയയും തമ്മിലുള്ള യുദ്ധം കൊടുമ്പിരി കൊണ്ടിരിക്കുകയാണ്. അപ്പോൾ തന്റെ വീട്ടിൽ നിന്ന് പട്ടാളം ഇറക്കിക്കൊണ്ടുപോയതാണ് ഹലീമയുടെ ഭർത്താവിനെയും മകനെയും. വർഷങ്ങൾ ഒരുപാട് മുന്നോട്ട് പോയി. യുദ്ധാന്തരീക്ഷം ശാന്തമാവുകയും ചെയ്തു. എന്നാൽ പോയവർ പിന്നീട് തിരിച്ചുവന്നില്ല. അവരെത്തേടിയുള്ള ഹലീമയുടെ സഞ്ചാരം. അതാണ് ചിത്രത്തിന്റെ പ്രമേയം. യാഥാർത്ഥസംഭവമാണ് ചിത്രം കൈകാര്യം ചെയ്യുന്നത് എന്നതാണ് സിനിമയെ ശ്രദ്ധേയമാക്കുന്നത്.

🔻ഹലീമ കേവലമൊരു വ്യക്തിയായിരുന്നില്ല. ഒരു സമൂഹത്തെ തന്നെ പ്രതിനിധീകരിക്കുകയാണ് ചിത്രം ഹലീമയിലൂടെ. ചരിത്രത്താളുകളിൽ സ്വർണ്ണലിപികളാൽ പേരെഴുതാനുള്ള അവസരങ്ങളായി പലപ്പോഴും യുദ്ധം മാറുമ്പോഴും നഷ്ടക്കണക്കുകൾ മാത്രം നിരത്താൻ അവശേഷിക്കുന്ന ഒരുപറ്റം ജീവനുകൾ കാണും അവർക്ക് കീഴെ. മറ്റാരുടെയും കണ്ണിൽ പെടാതെ ജീവിതം തങ്ങൾക്ക് മുന്നിൽ വെറും ചോദ്യചിഹ്നമായി അവശേഷിക്കുന്ന ഒരു സമൂഹം. അതിജീവനത്തിന്റെ സന്ദേശവും പേറി ജീവിതം ജയിച്ചുകയറുന്ന ചിലരുണ്ടാവും ആ കൂട്ടത്തിൽ. ജീവിതം അതുവരെ അവർക്ക് നൽകിയ ദുരന്താനുഭവങ്ങളിൽ നിന്ന് പാഠമുൾക്കൊണ്ട്, അതിൽ നിന്ന് ഊർജ്ജം സംഭരിച്ച് നരകതുല്യമായ യാതനകൾ അതിജീവിച്ച് ജീവിതത്തെ നോക്കിക്കാണുന്നവർ. അവരുടെ പ്രതിനിധിയാണ് ഹലീമ.

🔻യുദ്ധം ഇരയെ മാത്രമല്ല വേട്ടയാടുക, വേട്ടക്കാരനും അതിന്റെ ദൈന്യതയിലേക്ക് വഴുതിവീഴുമെന്ന ഭീകരമായ സത്യം കൂടി നമുക്ക് മനസ്സിലാക്കിത്തരികയാണ് സംവിധായകൻ. എന്നാൽ ഇതൊക്കെയും നമ്മേപ്പോലെ ഭൂമിയിൽ ജീവിച്ചുതീർത്തവരുടെ കഥയാണല്ലോ എന്നതാണ് വിരോധാഭാസം. കേവലം സിനിമാശൈലിയിലേക്ക്  കഥയെ രൂപാന്തരപ്പെടുത്താതെ പൂർണ്ണമായും റിയാലിറ്റിയെന്ന് നമ്മെ വിശ്വസിപ്പിച്ചെടുക്കാൻ അവതരണത്തിന് സാധിക്കുന്നുണ്ട്. ഏത് കാലത്തും ലോകത്തെ ഏത് സമൂഹത്തും ഈ കഥ ചേർന്നുനിൽക്കുമെന്നതാണ് സത്യം. നഷ്ടങ്ങൾ മാത്രം ഭൂമിയിൽ രേഖപ്പെടുത്തുന്ന യുദ്ധങ്ങൾക്ക് എന്നെങ്കിലുമൊരു അറുതി വീഴണമെന്ന പ്രാർത്ഥന മാത്രം ചിത്രം അവശേഷിപ്പിക്കുന്നു.

🔻ＦＩＮＡＬ ＶＥＲＤＩＣＴ🔻

Incendies അടക്കമുള്ള ചിത്രങ്ങൾ മുന്നോട്ട് വെക്കുന്ന യുദ്ധാനന്തര ജീവിതങ്ങൾ തന്നെയാണ് ഹലീമയുടെ ജീവിതത്തിലൂടെ ചിത്രം അടയാളപ്പെടുത്തുന്നത്. മനുഷ്യത്വമെന്നാൽ കേവലം പ്രഹസനങ്ങളായി മാറിയിരിക്കുന്ന കാലഘട്ടത്തിൽ യുദ്ധമില്ലാത്ത ലോകം ഒരു സ്വപ്നം മാത്രമായി അവശേഷിക്കുകയാണ്. ക്രൊയേഷ്യയുടെ ഓസ്കർ എൻട്രി ആയിരുന്ന ചിത്രം തീർച്ചയായും കാണേണ്ട അതിശക്തമായൊരു ഡ്രാമയാണ്. നമുക്ക് ചുറ്റും ഒരിക്കൽ സംഭവിച്ചേക്കാവുന്ന, ഇപ്പോൾ സംഭവിച്ചുകൊണ്ടിരിക്കുന്ന ജീവിതങ്ങളുടെ ഓർമ്മപ്പെടുത്തലുകൾ തന്നെയാണ് ഇവയൊക്കെയും.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻ഇസ്രായേൽ-പലസ്തീൻ യുദ്ധഭീകരതയെ കുറിച്ച് ഒരു പരിചയപ്പെടുത്തൽ ആവശ്യമുണ്ടെന്ന് തോന്നുന്നില്ല. വംശഹത്യകൾ ദിനംപ്രതി വർദ്ധിച്ചുകൊണ്ടിരിക്കുന്ന മേഖലയിൽ മനുഷ്യജീവനുകൾ എപ്പോഴും അപകടത്തിലാണ്. പല സിനിമകളിലും ആ പ്രദേശത്തെയും ജനങ്ങളുടെയും ദുരിതങ്ങളെ പറ്റി പ്രതിപാദിക്കുന്നുണ്ട്. അവയൊക്കെയും ഗൗരവകരമായ ആഖ്യാനശൈലിയാണ് അവലംബിച്ചിരിക്കുന്നത്. അവിടെയാണ് 'Tel Aviv On Fire' വേറിട്ട് നിൽക്കുന്നത്.

Year :2018
Run Time : 1h 40min

🔻സിനിമയുടെ അതെ പേരിലുള്ള ടെലിവിഷൻ ഷോയുടെ അണിയറയിൽ സഹാഹിയായി ജോലി ചെയ്യുകയാണ് ജറുസലേമിൽ വസിക്കുന്ന പലസ്തീനിയനായ സലാം. ഒരു ഘട്ടത്തിൽ അദ്ദേഹത്തിന് ആ സീരീസിന്റെ തിരക്കഥയെഴുതാൻ അവസരം കിട്ടുന്നു. അതെ സമയം തന്നെ ഇസ്രായേൽ മിലിറ്ററി ഉദ്യോഗസ്ഥനുമായ അസി യാദൃശ്ചികമായി അദ്ദേഹത്തിന്റെ ജീവിതത്തിലേക്ക് കടന്നുവരുന്നു. തുടർന്ന് സലാമിന്റെ ജീവിതത്തിലുണ്ടാവുന്ന സമ്മർദ്ദങ്ങളാണ് ചിത്രം കൈകാര്യം ചെയ്യുന്നത്.

🔻അങ്ങേയറ്റം സങ്കീർണ്ണമായ വിഷയത്തെ അതിന്റെ പ്രാധാന്യം ഒട്ടും ചോരാതെ നർമ്മത്തിന്റെ മേമ്പൊടിയോടെ അവതരിപ്പിച്ചിരിക്കുകയാണ് സംവിധായകൻ. സിനിമയിൽ കാണാനാവുന്ന സീരീസിന്റെ ഉള്ളടക്കം തന്നെ ഇസ്രായേൽ-പലസ്തീൻ കോൺഫ്ലിക്ട് ആണ്. റൊമാന്റിക്ക് മൂഡിലാണ് സീരീസ് മുന്നേറുന്നതെങ്കിലും അവിടിവിടെയായി രാഷ്ട്രീയവും പറഞ്ഞ് പോവുന്നുണ്ട്. എന്നാൽ അസിയേ കാണുന്നത് മുതൽ സീരീസ് വേറൊരു തലത്തിലേക്ക് കൊണ്ടുപോവാൻ സലാം നിർബന്ധിതനാവുകയാണ്. അതോടെ ചർച്ച ചെയ്യപ്പെടുന്നത് ഇരു രാജ്യങ്ങളുടെയും രാഷ്ട്രീയമാണ്.

🔻ഇസ്രയേലിലും പലസ്തീനിലും ഒരുപോലെ ടെലികാസ്റ്റ് ചെയ്യപ്പെടുന്ന സീരീസ് എന്നതാണ് ഏറ്റവും വെല്ലിവിളി. ഇരുവരുടെയും വികാരം വൃണപ്പെടുത്താതെ നോക്കേണ്ടത് സലാമിനെ പോലെ അണിയറയിലുള്ളവരുടെയും സ്പോൺസർമാരുടെയും ആവശ്യമാണ്. എന്നാൽ നിർബന്ധിത സാഹചര്യത്തിൽ അദ്ദേഹത്തിന് അസിക്ക് മുന്നിൽ വഴങ്ങുകയല്ലാതെ മറ്റു വഴികൾ ഉണ്ടായിരുന്നില്ല. സീരീസിലെ രാഷ്ട്രീയമല്ല, റൊമാൻസ് ആസ്വദിക്കാനാണ് അത് കാണുന്നതെന്ന് ചില കഥാപാത്രങ്ങൾ പറയുന്നുണ്ടെങ്കിലും രാഷ്ട്രീയം അവതരിപ്പിക്കുകയല്ലാതെ മറ്റ് രക്ഷയുണ്ടായിരുന്നില്ല. തുടർന്നുള്ള രസകരമായ സംഭവങ്ങൾ ചിത്രത്തിൽ കാണാം.

🔻ＦＩＮＡＬ ＶＥＲＤＩＣＴ🔻

ഒരുപാട് പുരസ്കാരങ്ങൾ വാരിക്കൂട്ടിയ ചിത്രം ലക്സംബർഗിന്റെ ഒഫിഷ്യൽ ഓസ്കാർ എൻട്രി കൂടിയായിരുന്നു. ഇതുവരെ കണ്ടുശീലിച്ചതിനപ്പുറമുള്ള ആഖ്യാനശൈലി ആസ്വാദനത്തിന് മുതൽക്കൂട്ടാണ്. ഇത്തരത്തിലുള്ള അനുഭവങ്ങൾ വിരളമായത് കൊണ്ട് തന്നെ തീർച്ചയായും കാണുക ഈ ചിത്രം.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻സിനിമ വെറും വിനോദോപാധി മാത്രമല്ല, ശക്തമായ രാഷ്ട്രീയത്തിന്റെ വക്താവ് കൂടിയാണ്. ഭരണഗൂഢവുമായി നിരന്തരം കലഹിക്കുന്ന കലാകാരന്മാരെ ലോകത്ത് കാണാൻ സാധിക്കും. ഇറാനിയൻ സംവിധായകൻ ജാഫർ പനാഹിയുടെ ജീവിതം അതിനുദാഹരണമാണ്. അദ്ദേഹത്തിന്റെ സിനിമകളുടെ ഉള്ളടക്കം എപ്പോഴും ഇറാനിയൻ ചട്ടക്കൂടിനുമപ്പുറം സംവദിക്കുന്നവയാണ്. ഇറാനിലെ കുട്ടികളുടെയും സ്ത്രീകളുടെയും സ്വാതന്ത്ര്യത്തെ പ്രമേയമാക്കി സിനിമകൾ അദ്ദേഹം ഒരുക്കിയിട്ടുണ്ട്. അത് അദ്ദേഹത്തെ പ്രതികൂലമായി ബാധിച്ചിട്ടുമുണ്ട്. പലപ്പോഴും ജയിൽ ശിക്ഷ അനുഭവിക്കേണ്ടി വരികയും സിനിമയിൽ നിന്ന് വിലക്ക് നേരിടേണ്ടി വരികയും ചെയ്തിട്ടുണ്ട്.

ആ സാഹചര്യത്തിൽ തന്നെ അദ്ദേഹം ഒരുക്കിയ ചിത്രമാണ് Taxi Tehran. ഒരു mainstream movie ആയിട്ടല്ല അദ്ദേഹം ആ സിനിമ സംവിധാനം ചെയ്തത്. ഒരു കാർ യാത്രയിൽ ക്യാമറയുമായി അദ്ദേഹം നഗരം ചുറ്റാനിറങ്ങി. അതിനിടയിൽ ആ കാറിൽ വന്നുപെട്ട തന്റെ അനന്തരവളോടും ഒരു C.D വില്പനക്കാരനോടുമടക്കം അദ്ദേഹം സംസാരിച്ചു. അതിലൊക്കെയും ഇറാന്റെ തനത് സിനിമാശൈലികളെ പറ്റി വാചാലനായിരുന്നു അവരൊക്കെയും. Wajib എന്ന സിനിമ കണ്ടപ്പോൾ എനിക്കോർമ്മ വന്നത് Taxi Tehranന്റെ അവതരണമാണ്. Wajibഉം ഒരു കാർ യാത്രയാണ്. അച്ഛനും മകനും ഒരു കല്യാണം വിളിക്കാൻ പോകുന്ന യാത്ര.

Year : 2017
Run Time : 1h 36min

🔻അച്ഛനും മകനും മെറ്റഫറായി നിലനിൽക്കുകയാണ് ഈ സിനിമയിൽ. യുദ്ധകലുഷിതമായ പലസ്തീനിയൻ ജനതയുടെ രണ്ട് അറ്റങ്ങളാണ് അബൂ ഷാദിയും മകൻ ഷാദിയും. ചിതറിക്കിടക്കുന്ന ജനതയെ ഐക്യപ്പെടുത്താൻ ആഗ്രഹിക്കുന്നവരുടെ പ്രതിരൂപമായി നിലകൊള്ളുകയാണ് അബൂ ഷാദി. തന്റെ മകളുടെ കല്യാണം വിളിക്കാൻ പലരെയും കണ്ടുമുട്ടുന്ന വഴിയിൽ മകനെ പറ്റി പറയുന്ന കള്ളത്തരങ്ങൾ ഓരോന്നും ആ ഐക്യം നഷ്ടപ്പെടാതിരിക്കാനാണ്. എന്നാൽ ഷാദിയാവട്ടെ ഒരിക്കൽ ഭരണഗൂഢത്തിനെതിരെ പ്രഷേധിക്കുകയും ഒടുക്കം നാട് വിടേണ്ടി വരികയും ചെയ്ത യുവാവ്. ആ ഇടവേളയിൽ അദ്ദേഹത്തിന്റെ സ്വഭാവത്തിന് കാര്യമായ മാറ്റങ്ങൾ ഉണ്ടായിട്ടുണ്ട്. ഒരുപക്ഷെ പലസ്തീനിയൻ കൽച്ചറിൽ നിന്ന് തന്നെ അദ്ദേഹത്തിന് വ്യതിയാനം സംഭവിച്ചിട്ടുണ്ട്. ഷാദിയുടെ സംഭാഷണങ്ങളിൽ അത് വ്യക്തമാണ്.

🔻ഷാദിയുടെ കാമുകിയുടെ അച്ഛൻ അബൂ ഷാദിയെ ഫോണിൽ വിളിക്കുമ്പോഴുള്ള സംഭാഷണശകലങ്ങളിൽ ഫലസ്തീനിന്റെ സാമൂഹികാന്തരീക്ഷത്തെ വരച്ചിടുന്നുണ്ട്. യുദ്ധഭീതിയിൽ കഴിയുന്ന ജനങ്ങളെയും ശത്രുവാണോ മിത്രമാണോ എന്ന സംശയം പോലും നിഴലിക്കുന്ന ജനങ്ങളെയും അവർക്ക് ചുറ്റും കാണാൻ സാധിക്കുന്നുണ്ട്. അവരുടെ സംഭാഷണങ്ങളിൽ പോലുമുണ്ട് അഭിപ്രായങ്ങളിലെ വൈരുധ്യങ്ങൾ. ഒരുപക്ഷെ പലസ്തീനിൽ യുദ്ധമില്ലാത്ത സാഹചര്യം ഉണ്ടായാൽ ആ പ്രദേശം എങ്ങനെയാവും എന്നൊരു സൂചന കൂടി ചിത്രം നൽകുന്നുണ്ട്.

🔻ജീവിതത്തിൽ അച്ഛനും മകനുമായ അബൂ ഷാദിയും ഷാദിയുമാണ് ലൈംലൈറ്റിൽ ഗംഭീര പ്രകടനം കാഴ്ചവെക്കുന്നത്. വെറുമൊരു ഡ്രാമയെ വേറൊരു തലത്തിലേക്ക് ഉയർത്തുന്നത് ഇരുവരുടെയും പ്രകടനമാണ്. പക്കാ റിയലിസ്ടിക്ക് അപ്രോച്ചാണ് സംവിധായകൻ അവലംബിച്ചിട്ടുള്ളത്. അതുകൊണ്ട് തന്നെ ഇത്തരം ഡ്രാമകൾ ആസ്വദിക്കാത്തവർക്ക് മടുപ്പ് അനുഭവപ്പെട്ടേക്കാം.

🔻ＦＩＮＡＬ ＶＥＲＤＩＣＴ🔻

എപ്പോഴും വാർത്തകളിൽ നിറയുന്ന പലസ്തീനിന്റെ സാമൂഹികാന്തരീക്ഷം ശക്തമായ ഭാഷയിൽ വാജിബ് നമുക്ക് ചൂണ്ടിക്കാണിക്കുന്നുണ്ട്. വെറും കല്യാണം വിളികളിൽ ഒതുങ്ങാതെ രണ്ട് കഥാപാത്രങ്ങളിലൂടെ ഒരു സമൂഹത്തെ തന്നെ പ്രതിനിധീകരിച്ചുള്ള സംഭാഷണങ്ങൾക്ക് തന്നെ സാക്ഷിയാവാൻ ചിത്രത്തിലൂടെ സാധിക്കുന്നുണ്ട്. ഇത്തരം പൊളിറ്റിക്കലി പ്രാധാന്യമുള്ള ഡ്രാമകൾ ഇഷ്ടപ്പെടുന്നവർ മാത്രം കാണുക. ഒപ്പം Taxi Tehran കൂടി അത്തരക്കാർക്ക് നിർദ്ദേശിക്കുന്നു.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻മെക്സിക്കോ എന്ന ചെറു രാജ്യം സമ്പദ്വ്യവസ്ഥയുടെ കാര്യത്തിൽ ഒരുപാട് മുന്നിൽ നിൽക്കുന്ന ഒന്നാണ്. മാത്രമല്ല വളർച്ചാനിരക്കിലും തങ്ങളുടേതായ സ്ഥാനം അവർ കണ്ടെത്തുന്നുണ്ട്. നോർത്ത് അമേരിക്കൻ ഭൂഖണ്ഡത്തിലെ അഭിവാജ്യ ഘടകങ്ങളിൽ ഒന്ന് തന്നെയാണ് ഈ രാജ്യം. എന്നാൽ ഇവയ്‌ക്കെല്ലാം ഭീഷണിയായി നിൽക്കുന്ന ഒന്നുണ്ട് ആ രാജ്യത്ത്. ലോകത്തെ ഏറ്റവും വലിയ Drug Cartelഉകളിൽ ഒന്നാണ് ഈ രാജ്യം. ഒപ്പം Organ Traffickingഉം.

Year : 2017
Run Time : 1h 23min

🔻നാം സ്ഥിരം വായിക്കുന്ന ഫെയറി ടെയ്‌ലുകളിൽ എന്തെല്ലാം കാര്യങ്ങളാണ് തുടർച്ചയായി വരാറുള്ളത്. രാജകുമാരൻ. രാജകുമാരി,അവരുടെ പരിവാരങ്ങൾ, ദുർമന്ത്രവാദികൾ, കടുവകൾ, ചെന്നായകൾ അങ്ങനെ നീണ്ടുപോകും സംഗതികൾ. ഇവയ്‌ക്കെല്ലാം പുറമെ മാറ്റിനിർത്താൻ സാധിക്കാത്ത ഒരു കാര്യം കൂടിയുണ്ട്. മൂന്ന് വരങ്ങൾ. ഇതേ കുറിച്ച് സംസാരിക്കുന്ന വിദ്യാർത്ഥികളുടെ കാതുകളിലാണ് വെടിശബ്ദം മുഴങ്ങുന്നത്. തുടർന്ന് ജീവൻ രക്ഷിക്കാനുള്ള പരക്കം പാച്ചിലിലാണ് ഓരോരുത്തരും.

അങ്ങനെയൊരു സന്ദർഭത്തിലാണ് എസ്‌ട്രെല്ല ഷൈനിനെയും സംഘത്തെയും കണ്ടുമുട്ടുന്നത്. നഷ്ടങ്ങളുടെ കണക്കുപുസ്തകങ്ങൾ മാത്രം കയ്യിലൊതുക്കാൻ വിധിക്കപ്പെട്ട ചില ബാല്യങ്ങൾ. മാതാപിതാക്കളുടെ സ്നേഹവും വാത്സല്യവും കരുതലും അറിഞ്ഞ് ജീവിക്കേണ്ട പ്രായത്തിൽ കയറിക്കിടക്കാൻ ഒരു മേൽക്കൂര പോലും ഇല്ലാത്ത കുരുന്നുകൾ. അവർക്കിടയിലേക്ക് എസ്‌ട്രെല്ല കൂടി വരുമ്പോൾ അവളൊരു ദൗത്യത്തിന്റെ കൂടി ഭാഗമാവുകയായിരുന്നു. അവർക്ക് ചുറ്റും അനേകം വെല്ലുവിളികളും.

🔻കേവലമൊരു സിനിമ എന്നതിലുപരി വ്യക്തമായ രാഷ്ട്രീയത്തിന്റെ വക്താവ് കൂടിയാണ് Tigers Are Not Afraid. സിനിമയുടെ കേന്ദ്രകഥാപാത്രങ്ങളായ ബാല്യങ്ങളിലൂടെ തുറന്ന് കാട്ടുന്നത് രാജ്യത്തിന്റെ തന്നെ സാമൂഹികവ്യവസ്ഥിതിയെയാണ്. Sicario എന്ന ചിത്രത്തിൽ കണ്ട Drug Cartelsനെ അതിന്റെ തീവ്രതയോടെ ദർശിക്കാനാവും ഈ ചിത്രത്തിൽ. ഒരു സുപ്രഭാതത്തിൽ തനിക്ക് ചുറ്റുമുള്ളവരൊക്കെ കാണാതാവുകയെന്ന ദുസ്വപ്നവും പേറി ജീവിക്കുന്ന ജനങ്ങളുടെ നേർക്കാഴ്ച്ചയാണ് ഓരോ കഥാപാത്രങ്ങളും. സംസാരശേഷി ഉണ്ടായിരുന്ന Morro എന്തോ കണ്ട് ഭയന്ന് സംസാരശേഷി നഷ്ടപ്പെട്ടതാണെന്ന സ്റ്റേറ്റ്മെന്റിൽ തന്നെയുണ്ട് സാധാരണജനങ്ങളുടെ ദുസ്സഹമായ ജീവിതത്തിന്റെ അടയാളപ്പെടുത്തലുകൾ. ഇത്തരത്തിൽ അനവധി ജീവനുകളുടെ ബാക്കിപത്രമാണ് ഈ ചിത്രം.

🔻സിനിമയെന്ന രീതിയിൽ അതിന്റെതായ മികവ് പുലർത്തുന്നുണ്ട് ഈ ചിത്രം. സാധാരണ ഗതിയിലുള്ള അവതരണത്തിൽ ഭംഗിയായി ഫാന്റസി-ഹൊറർ എലമെന്റുകൾ കൂട്ടിച്ചേർത്തിരിക്കുന്നത് കാണാം. സിനിമയെന്ന നിലയിലുള്ള അനുഭവത്തിന് അത് മാറ്റേകുന്നുണ്ട്. ഭൂരിഭാഗവും റിയലിസ്റ്റിക് രീതി അവലംബിക്കുന്ന അവതരണം ആസ്വാദനത്തിന് ഗുണം ചെയ്യുന്നുണ്ട്. ആ കുട്ടികളുടെ ഗംഭീര പ്രകടനം പറയാതിരിക്കാൻ പറ്റില്ല. എന്തൊരു റിയാലിറ്റിയാണ് അവർ പകർന്ന് നൽകുന്നത്. ഒപ്പം രാത്രിയുടെ ഭീകരത പകർത്തിയെടുക്കുന്ന ഛായാഗ്രഹണമികവും പശ്ചാത്തലസംഗീതവും അഭിനന്ദനാർഹം തന്നെ.

🔻ＦＩＮＡＬ ＶＥＲＤＩＣＴ🔻

Drug Mafiaയുടെയും Organ Traffickingന്റെയും ഇരയായി കഴിഞ്ഞ പത്ത് വർഷങ്ങൾക്കിടെ കൊല്ലപ്പെട്ട ലക്ഷക്കണക്കിന് ജനങ്ങളുടെയും കാണാനില്ല എന്ന് മാത്രം അറിവുള്ള അറുപതിനായിരത്തോളം ജീവനുകളുടെയും ഓർമപ്പെടുത്തലാണ് ഈ ചിത്രം. മെക്സിക്കോ എന്ന രാജ്യത്തിൻറെ ക്രൈം റേറ്റ് ഏറ്റവും കൂടുതൽ കുടിയിരിക്കുന്നത് ഈ രണ്ട് സംഗതികളിലാണ്. അവിടുത്തെ ബാല്യങ്ങളെ എങ്ങനെയാണ് ഇതൊക്കെ ബാധിക്കുന്നത്.? ഒരിക്കലും നഷ്ടപ്പെടുത്തരുത് ഈ ചിത്രം. കേവലം ഒന്നര മണിക്കൂറിൽ ഒരുപാട് ജീവിതങ്ങൾ നമ്മെ കാത്തിരിക്കുന്നുണ്ട്.

ＡＢ ＲＡＴＥＳ ★★★★☆

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

🔻7 Boxes, Gold Seekers എന്നീ രണ്ട് ചിത്രങ്ങൾക്കും ഒരു പ്രത്യേകതയുണ്ട്. രണ്ട് സിനിമകളും കേന്ദ്രീകരിക്കുന്നത് സമൂഹത്തിലെ Middle class-Low Class categoryലേക്കാണ്. ദിനേനയുള്ള കാര്യങ്ങൾക്കായി പണം കണ്ടെത്താൻ പരിശ്രമിക്കുന്ന കൂട്ടർ. ജീവിതത്തിൽ കര പറ്റാൻ ഒരു സന്ദർഭം തെളിഞ്ഞാൽ അതിനായി എത്ര വേണമെങ്കിലും പരിശ്രമിക്കുന്നവർ. ചില സിനിമ ഡയലോഗുകൾ പോലെ നഷ്ടപ്പെടാൻ ഒന്നുമില്ലാത്തവർ എന്ത് ചെയ്യാനും മടിക്കില്ല എന്ന ടൈപ്പ്. ഈ രണ്ട് സിനിമയിലെ കഥകളും place ചെയ്തിരിക്കുന്നത് അത്തരത്തിലൊരു സമൂഹത്തിലാണ്. അവിടെയല്ലാതെ മറ്റെവിടെയാണ് ഒരു നിധി തേടിപ്പോവുന്ന കഥ ഇത്ര ത്രില്ലിങ്ങായി അവതരിപ്പിക്കാൻ സാധിക്കുക.

Year : 2017
Run Time : 1h 42min

🔻ന്യൂസ് പേപ്പർ ബോയ് ആയി പകലും വിദ്യാർഥിയായി രാത്രികാലവും കഴിച്ചുകൂട്ടിയിരുന്ന മാനുവലിന്റെ കൈകളിലേക്കാണ് മുത്തച്ഛൻ ഒരു പുസ്തകം നീട്ടിയത്. പ്രത്യക്ഷത്തിൽ അവന് യാതൊന്നും തോന്നിയില്ലെങ്കിലും ഓരോ നിമിഷം കഴിയുന്തോറും മനസ്സിൽ ചില ചിന്തകൾ ഉടലെടുത്തു. വെറും വായനക്ക് വേണ്ടിയാണോ മുത്തച്ഛൻ അത് സമ്മാനിച്ചത്. മുത്തച്ഛൻ പണ്ട് നിധി തേടി പോയിരുന്ന കഥകൾ മുത്തശ്ശി പറഞ്ഞ് കേട്ടിട്ടുള്ളത് കൊണ്ട് തന്നെ ഒരല്പം കൗതുകം അവനിൽ നിറഞ്ഞു. അത്തരത്തിൽ പുസ്തകം പരിശോധിച്ചപ്പോൾ ചില അടയാളപ്പെടുത്തലുകൾ കൂടി ശ്രദ്ധയിൽ പെട്ടു. കൂടുതൽ പരിശോധിച്ചപ്പോഴാണ് അതൊരു നിധിയിലേക്കുള്ള കവാടമാണെന്ന് അവൻ തിരിച്ചറിഞ്ഞത്.

🔻ഒരു ദിവസം നടക്കുന്ന കഥയാണ് സംവിധായകൻ ആദ്യ ചിത്രമായ '7 Boxes'ലൂടെ പറഞ്ഞിരുന്നത്. അപാര മേക്കിങ്ങ് ആയിരുന്നു ആ ചിത്രം. ഈ സിനിമയിലും വളരെ ലളിതമായിട്ടുള്ള പ്രമേയമാണ് കഥയായിട്ടുള്ളത്. എന്നാൽ അതിന്റെ അവതരണം ഏറെ മികവ് പുലർത്തുന്നുണ്ട്. ആദ്യം തന്നെ കഥയിലേക്ക് കടക്കുകയും തുടർന്ന് നർമ്മം കൂടി ഇടകലർത്തിയുള്ള നിധി തേടലുമൊക്കെ അതീവ രസകരമാണ്. ഒപ്പം നല്ല ത്രില്ലിങ്ങും. ഒരു നിമിഷം പോലും നമ്മെ കണ്ണെടുക്കാൻ അനുവദിക്കാത്ത വിധം engage ചെയ്ത് ഇരുത്തുന്നുണ്ട് ചിത്രം. സമയമോ വളരെ തുച്ഛവും.

🔻കേന്ദ്രകഥാപാത്രങ്ങളായ കുറച്ചുപേരെ അവതരിപ്പിച്ച ശേഷം ചെറിയ റോളുകളിൽ വന്നുപോവുന്ന ചിലരെ ക്ലൈമാക്സിലേക്ക് ലിങ്ക് ചെയ്ത വിധം ശരിക്കും രസിപ്പിക്കുന്നുണ്ട്. ഒടുക്കം വരുന്ന വഴിത്തിരിവുകളും സിനിമ അവസാനിക്കുന്ന വിധവുമൊക്കെ ഏറെ ഇഷ്ടപ്പെട്ടു. അതൊക്കെയും കൈകാര്യം ചെയ്ത വിധം സിനിമയെ വേറൊരു തലത്തിലേക്ക് എത്തിക്കുന്നുണ്ട്. അവസാനത്തെ ഷോട്ട് തന്നെ അതിനുദാഹരണം. എന്താ ഭംഗി..!! നിധിയിലേക്കുള്ള വഴിയിൽ സംഭവിക്കുന്ന യാദൃശ്ചികമായ ചില കാര്യങ്ങൾ ആ രംഗങ്ങൾ എലവേറ്റ് ചെയ്യുന്നുണ്ട്. മിസ്റ്ററി-ത്രില്ലർ എന്ന തലത്തിൽ നല്ലൊരു ആസ്വാദനം സമ്മാനിക്കുന്നു ഈ ചിത്രം.

🔻പശ്ചാത്തലസംഗീതം ഗംഭീരമെന്നെ പറയാനുള്ളൂ. അത്രക്ക് ബോധിച്ചു ഓരോ BGM വർക്കുകളും. വയലിൻ ഒരു പ്രധാന ഉപകരണമായി ഉപയോഗിച്ച് രംഗങ്ങളുടെ താളത്തിനൊത്ത് സംയോജിപ്പിച്ച് ത്രില്ലിന്റെ തീവ്രത വർദ്ധിപ്പിക്കാനായിട്ടുണ്ട് അവയിലൂടെ. ഒപ്പം 7 boxesലെ പോലെ തന്നെ കിടിലൻ ക്യാമറ വർക്കുകളും ചടുലമായ എഡിറ്റിങ്ങും അവതരണത്തിന് വേഗം സമ്മാനിക്കുന്നു.

🔻ＦＩＮＡＬ ＶＥＲＤＩＣＴ🔻

ഒരടിപൊളി അഡ്വഞ്ചർ-മിസ്റ്ററി-ത്രില്ലർ തന്നെയാണ് The Gold Seekers. എല്ലാ തലങ്ങളിലും ഒരുപോലെ മികവ് അടയാളപ്പെടുത്തുന്ന ചിത്രം. ഒരു നിമിഷം പോലും ബോറടിയില്ലാതെ നമ്മുടെ ഊഹത്തിനപ്പുറം സഞ്ചരിക്കുന്ന രംഗങ്ങളാൽ സമൃദ്ധം. തീർച്ചയായും നല്ലൊരു അനുഭവം തന്നെ സമ്മാനിക്കും ഈ ചിത്രം എന്നുറപ്പ്. പരാഗ്വേയുടെ ഓസ്കാർ എൻട്രി കൂടിയായിരുന്നു ഈ ചിത്രമെന്ന് ഓർമിപ്പിക്കുന്നു. ഇനി ഒന്നും നോക്കണ്ട. അങ്ങ് ആസ്വദിക്കുക.

ＡＢ ＲＡＴＥＳ ★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

Year : 2014
Run Time : 1h 50min

🔻തായ് സിനിമകൾ കണ്ടപ്പോൾ മനസ്സിലായി കാര്യം എന്തെന്നാൽ ഒരേ അച്ചിൽ ചുട്ട അപ്പം പോലെ വരുന്ന സിനിമകളെല്ലാം വൻ വിജയം നേടുമെന്നാണ്. അതിൽ പ്രധാന ചേരുവ പ്രണയവും. ഒരേതരത്തിലെ 3-4 സിനിമകൾ കണ്ട് മനം മടുത്തതിനാൽ ഫീൽ ഗുഡ് മൂവി തേടി തായ് ഭാഷയിൽ ചെല്ലുന്ന പരിപാടി ഞാനങ്ങ് നിർത്തി. എന്നാൽ വീണ്ടും ഓർക്കാൻ കൂടി കാണാൻ കാരണമായത് 'Teachers Diary' എന്ന സിനിമയാണ്.

🔻പഠനവും മനസ്സിലാക്കലും തമ്മിൽ ആനയും ഉറുമ്പും കണക്കെയുള്ള വ്യത്യാസമുണ്ട്. അതിൽ പ്രധാന പങ്ക് വഹിക്കുന്നത് നമ്മുടെ അധ്യാപകരാണ്. ചിലർ അധ്യാപനം അവരുടെ കർത്തവ്യമായി കാണുമ്പോൾ മറ്റ് ചിലർക്ക് അത് വെറുമൊരു ചടങ്ങ് തീർക്കലാണ്. നമ്മുടെ അധ്യാപകരെ പറ്റി നമുക്ക് ചില സങ്കൽപങ്ങളൊക്കെയുണ്ടാവും. ചിലർ അത് തൃപ്തിപ്പെടുത്തുമ്പോൾ മറ്റ് ചിലർ നിരാശ നൽകുന്നു. കുറച്ചുപേർ വിദ്യാർത്ഥികളെ തന്റേതായ രീതിയിൽ മെച്ചപ്പെടുത്തിയെടുക്കുന്നു. അവരോട് ആത്മബന്ധം സൃഷ്ടിക്കുന്നു. പഠനത്തിന് വേറിട്ട വഴികൾ തെരഞ്ഞെടുക്കുന്നു

🔻ഒന്നിടവിട്ടുള്ള വർഷങ്ങളിൽ ഒരേ സ്‌കൂളിൽ തന്നെ നിയമിതരാവുകയാണ് ആണും സോങ്ങും. ഇരുവരും അവിടെ ഒറ്റക്കാണ്. പഠിപ്പിക്കാനായി വിരലിലെണ്ണാവുന്ന വിദ്യാർത്ഥികൾ മാത്രം. കുട്ടികളുമായി വളരെ പെട്ടെന്ന് അടുപ്പം സ്ഥാപിക്കുന്ന ആനിന് അതൊരു ആനന്ദവേള കൂടിയായിരുന്നു. എന്നാൽ സോങ്ങിന് നേരെ തിരിച്ചും.

അവിടെയാണ് സോങ്ങിന് ആനിന്റെ ഡയറി കിട്ടുന്നത്. പിന്നീടുള്ള സോങ്ങിന്റെ ഓരോ വേളകളും സന്തോഷത്താൽ നിറയുന്നു. കുട്ടികളുമായി വളരെയേറെ അടുപ്പത്തിലാവുന്നു. ഒറ്റപ്പെടലിൽ നിന്ന് ആ ഡയറി അദ്ദേഹത്തിന് മോചനം നൽകുന്നു.

🔻പ്രണയം പറയുന്ന സ്ഥിരം പ്ലോട്ടികളിൽ നിന്നും പോട്രേയലിൽ നിന്നും മാറി സഞ്ചരിക്കുന്നിടത്താണ് ടീച്ചേഴ്സ് ഡയറി സുന്ദരമായ അനുഭവമാകുന്നത്. ഒരുപക്ഷെ ഞാൻ കണ്ടതിൽ വെച്ച് ഏറ്റവും പ്രിയപ്പെട്ട തായ് ചിത്രം എന്ന് പറയാൻ സാധിക്കും. അത്ര മനോഹരമായിരുന്നു ഈ പ്രണയം.

🔻ഏകാന്തതയിൽ സോങ്ങിന് കൂട്ടായി ഉണ്ടായിരുന്ന ആനിന്റെ ഡയറിയിലെ വരികളിലൂടെ അദ്ദേഹം പ്രണയത്തെ വമിക്കുന്നത് മനോഹരമായാണ് കാട്ടിയിരിക്കുന്നത്. അതുപോലെ തന്നെ തിരിച്ചും. ഒരിക്കലും പ്രണയമെന്ന് നമ്മോട് പറയാതെ നമ്മുടെ മനസ്സിൽ ആ വിചാരം സൃഷ്ടിച്ചെടുക്കുന്ന രീതിയിൽ ഹൃദ്യമായ ആഖ്യാനം ഈ ഡയറിയെ പ്രണയപൂരിതമാക്കുന്നു. കൂടെ അധ്യാപകനിലെ മാറ്റങ്ങളെയും തെല്ലും നാടകീയതയില്ലാതെയാണ് കാട്ടിയിരിക്കുന്നത്.

🔻കുട്ടികളുടെ തമാശകളും സന്തോഷങ്ങളും അവരുടെ നിഷ്കളങ്കമായ സ്വഭാവങ്ങളുമൊക്കെ വളരെയേറെ ജീവൻ നൽകുന്നുണ്ട് ഈ കഥക്ക്. അതോടൊപ്പം അവരുടെ ആകർഷണീയമായ മുഖങ്ങളും. ഒരൊറ്റ രംഗമൊഴികെ മറ്റെല്ലാം നമ്മെ സിനിമയോട് അടുപ്പിക്കുന്നുണ്ട്. കൂടെ വശ്യമായ കാഴ്ചകളും.

🔻ＦＩＮＡＬ ＶＥＲＤＩＣＴ🔻

പതിവ് റൊമാന്റിക് സിനിമകൾ പിന്തുടരുന്ന പാതയിൽ നിന്ന് വ്യത്യസ്തമായി സഞ്ചരിക്കുന്ന ചിത്രം മനസ്സിനും കണ്ണിനും സുന്ദരമായ അനുഭൂതി സൃഷ്ടിക്കുന്നുണ്ട്. പ്രണയത്തെ ഇത്ര ലളിതമായും മനോഹരമായും അവതരിപ്പിക്കുന്ന ചിത്രം മനം കവരുന്ന പ്രണയാനുഭവമാവുമെന്ന കാര്യത്തിൽ സംശയമില്ല.

ＭＹ ＲＡＴＩＮＧ :: ★★★★☆

ചിത്രം ടെലിഗ്രാം ചാനലിൽ ലഭ്യമാണ് Abi Suggests

🔻ＳＴＯＲＹ ＬＩＮＥ🔻

26 നായകൾ. അവരുടെ മുന്നിലുള്ള എല്ലാ തടസ്സങ്ങളും ഭേദിച്ചുകൊണ്ട് രോഷാകുലരായി മുന്നോട്ട് കുതിക്കുന്നു. ഒടുവിൽ അവർ എത്തിച്ചേരുന്നത് അവന്റെ മുന്നിലാണ്. 20 വർഷമായി തന്നെ വേട്ടയാടിക്കൊണ്ടിരിക്കുന്ന ഈ സ്വപ്നം അവൻ സുഹൃത്തിനോട് വിവരിക്കുകയാണ്. ലെബനനിൽ അവർ പങ്കെടുത്ത യുദ്ധത്തിന് ശേഷമാണ് ജീവിതം ഇങ്ങനെ.

എന്നാൽ ആ സ്വപ്നം കേൾക്കുന്ന Ari Folman അത്ഭുതപ്പെടുകയാണ്. കാരണം ആ യുദ്ധത്തെപ്പറ്റിയുള്ള ജീവിതത്തിലെ അനുഭവങ്ങൾ അയാൾ പാടെ മറന്നിരിക്കുന്നു. തന്റെ ജീവിതത്തിലെ പ്രധാനപ്പെട്ട ഘട്ടത്തിൽ നടന്ന സംഭവങ്ങൾ. എല്ലാം മനസ്സിൽ നിന്ന് മാഞ്ഞിരിക്കുന്നു. പിന്നീട് അത് വീണ്ടെടുക്കാനുള്ള ശ്രമമാണ് ഫോൾമാന്റെത്. അതിനായി അദ്ദേഹം സുഹൃത്തുക്കളുടെ പക്കൽ പോവുന്നു. തുടർന്ന് ഒരു യുദ്ധഭീകരതയുടെ കഥ അവർ കൂട്ടിച്ചേർക്കുന്നു.

🔻ＢＥＨＩＮＤ ＳＣＲＥＥＮ🔻

സംവിധായകന്റെ തന്നെ ജീവിതത്തിൽ നിന്ന് ഒരേട് പകുത്ത് സിനിമയൊരുക്കിയിരിക്കുകയാണ് പുള്ളി. ആ അനുഭവം സിനിമയായപ്പോൾ ലോകത്തിന് ലഭിച്ചത് ഒരിക്കലും മറക്കാനാവാത്ത ഒരു ചലച്ചിത്രാനുഭവമാണ്. ഇതിന് മുമ്പോ ശേഷമോ ആരും നിർമ്മിക്കാൻ ശ്രമിക്കാത്ത ഒന്ന്.

ഇസ്രായേൽ ഗവണ്മെന്റിന്റെ ഒത്താശയോടെ പലസ്തീൻ ജനതയെ ഒന്നടങ്കം ആക്രമിക്കുന്ന, അവരുടെ അന്ത്യം കുറിക്കുന്ന ലെബനീസ് ക്രിസ്ത്യൻ പാർട്ടിയുടെ ക്രൂരതകളുടെ മനസ്സ് മരവിപ്പിക്കുന്ന ദൃശ്യങ്ങളാണ് സംവിധായകൻ ഒരുക്കിയിരിക്കുന്നത്. നിരപരാധികളെ കാരണങ്ങൾ ഏതുമില്ലാതെ നിർദാക്ഷണ്യം കൊന്നുതള്ളുമ്പോൾ അത് തടയാൻ കെൽപുള്ളവർ പോലും കൈകെട്ടി നോക്കിനിൽക്കുന്ന കാഴ്ചയാണ് കാണാൻ സാധിക്കുക.അധികാരികളുടെ കുറിക്ക് കൊള്ളുന്ന സംഭാഷണങ്ങളും രംഗങ്ങളും ചിത്രത്തെ വേറിട്ടതാകുന്നു.

നിരപരാധികളായ പല പട്ടാളക്കാരും മുതിർന്ന ഉദ്യോഗസ്ഥരുടെ തോൽപാവകളാവുമ്പോൾ മനസ്സില്ലാമനസ്സോടെ പല ജീവനുകളും അവരിലൂടെ പൊഴിയുന്നു. സംവിധായകൻ തന്നിലൂടെ തന്നെ അത് പ്രേക്ഷകരിലേക്ക് എത്തിക്കുകയാണ്.

സിനിമയുടെ അവസാനം കാട്ടുന്ന കുറച്ച് ഒറിജിനൽ ഫൂട്ടേജുകളുണ്ട്. ഒരുപക്ഷെ മനുഷ്യൻ എത്ര ക്രൂരനാവാം എന്നതിന്റെ നേർക്കാഴ്ചയാണ് ആ രംഗങ്ങൾ. മനുഷ്യനോളം അധഃപതിക്കാൻ മനുഷ്യന് മാത്രമേ സാധിക്കൂ എന്ന് അടിവരയിട്ട് പറയുകയാണ് സംവിധായകൻ ഈ ചിത്രത്തിലൂടെ.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ🔻

വിഷ്വലുകളും സൗണ്ട് ട്രാക്കുകളും ഇതുവരെ നാം അനുഭവിച്ച് ശീലിച്ചവയല്ല. ഗംഭീരമാണ് അവയുടെ മേക്കിങ്ങ്. ആനിമേഷൻ ചിത്രമാണോ അതോ ഒറിജിനൽ ആണോ സംശയം തോന്നിക്കും  വിധമാണ് ഓരോ ഫ്രെയിമുകളും. ഏത് ഷോട്ട് എടുത്താലും അത്ഭുതപ്പെടുത്തും വിധം നമ്മെ ആകർഷിക്കും അതിന്റെ ഭംഗി. ഒരു ത്രില്ലർ ചിത്രത്തിന് വേണ്ട രീതിയിൽ ഒരുക്കിയിരിക്കുന്ന ബിജിഎം യുദ്ധരംഗങ്ങൾക്കൊക്കെ മിഴിവ് ഏകുന്നുണ്ട്. ശബ്ദങ്ങളുടെ ഉപയോഗം പോലും മികവ് പുലർത്തുന്നുണ്ട്. ഹെലികോപ്ടറിന്റെ ഫാൻ കറങ്ങുന്ന ശബ്ദമൊക്കെ വ്യക്തമായി കേൾക്കാം. അത് പോലെ ഓരോ മൈന്യൂട്ട് ശബ്ദങ്ങളും ശ്രവിക്കാനാവും.

ഓസ്‌കാറിന്റെ ചരിത്രത്തിൽ തന്നെ ഒരേയൊരു ആനിമേഷൻ ചിത്രമാണ് മികച്ച വിദേശഭാഷാ ചിത്രത്തിനായി നോമിനേറ്റ് ചെയ്യപ്പെട്ടിട്ടുള്ളത്. ആ ഖ്യാതി Waltz With Bashirന് സ്വന്തമാണ്. ആഭ്യന്തരമായി ഒരുപാട് പ്രാധാന്യമുള്ള ചിത്രം ഒരുപാട് അവാർഡുകൾ വാരിക്കൂട്ടി. പല ഫിലിം ഫെസ്റ്റുകളിലും കയ്യടി നേടി.

🔻ＦＩＮＡＬ ＶＥＲＤＩＣＴ🔻

ഒരുപക്ഷെ ജീവിതത്തിൽ ഇതുപോലെയൊരു ആനിമേഷൻ ചിത്രം അനുഭവിക്കാൻ സാധ്യതയില്ല. യുദ്ധഭീകരതയെ അതിഗംഭീരമായി സ്ക്രീനിലും നമ്മുടെ മനസ്സിലും പകർത്തുന്ന ചിത്രം ഒരുപാട് ചിന്തിപ്പിക്കുന്നുണ്ട്. പലസ്തീൻ ജീവിതങ്ങൾ ഇപ്പോഴും ജീവന് വേണ്ടി പോരാടുമ്പോൾ, കുരുന്നുകളടക്കം തോക്കിൻ മുനക്ക് മുന്നിൽ പതറാതെ നിൽക്കുമ്പോൾ ചിത്രത്തിന്റെ കാലിക പ്രസക്തിയും ചോദ്യചിഹ്നമാവുന്നു. തീർച്ചയായും കണ്ടിരിക്കേണ്ട ചിത്രത്തിന്റെ കൂട്ടത്തിൽ ഈ ചിത്രവും ചേരുന്നു.


ＭＹ ＲＡＴＩＮＧ :: ★★★★½

ചിത്രം ടെലിഗ്രാം ചാനലിൽ ലഭ്യമാണ്. Abi Suggests

"അതിരുകളില്ലാത്ത സ്നേഹത്തിന്റെ മറ്റൊരു ഭാഷ്യം"


💢ആൽപ്സ് പർവ്വതനിരകളിലാണ് ആ പക്ഷിക്കൂട് നിർമ്മിച്ചിരിക്കുന്നത്. രണ്ട് പരുന്തുകൾ തങ്ങളുടെ മുട്ട വിരിയുന്നതും കാത്തിരിപ്പാണ്. അങ്ങനെയൊരു ദിവസം ആ മുട്ട വിരിയുന്നു. അതോടൊപ്പം തന്നെ ഒരു മത്സരബുദ്ധി കൂടി അവിടെ ഉണരുകയാണ്.

അതെ സമയം തന്നെ താഴ്വാരത്ത് താമസിക്കുന്ന ലൂക്കാസ് ഏകാന്തനാണ്. തന്റെ അമ്മയുടെ മരണത്തിന് ശേഷം അച്ഛനോട് പോലും ഒരു വാക്ക് അവൻ മിണ്ടിയിട്ടില്ല. അമ്മയുടെ ഓർമ്മകൾ തങ്ങുന്ന ആ വീട്ടിൽ ഒറ്റക്ക് വസിക്കാൻ ഇഷ്ടപ്പെടുന്ന ലൂക്കാസിന്റെ അടുക്കലേക്ക് ഒരു ദിവസം ആ പരുന്തിൻ കുഞ്ഞ് എത്തിപ്പെടുന്നു. തുടർന്ന് ഇരുവരും തമ്മിലുള്ള സമ്പർക്കമാണ് ചിത്രം കൈകാര്യം ചെയ്യുന്നത്.

💢മനുഷ്യനും മൃഗങ്ങളും തമ്മിലുള്ള സ്നേഹസഹവാസത്തിന്റെ കഥകൾ പല സിനിമകളിലും നാം കണ്ടിട്ടുണ്ട്. ഹാച്ചിയും How To Train Your Dragonഉമൊക്കെ ഇഷ്ടചിത്രങ്ങളായതും പ്രമേയത്തിലെ വ്യത്യസ്തതയും ലാളിത്യവും കൊണ്ടാണ്. അത്തരത്തിൽ അതെ പ്രമേയത്തിൽ ഓസ്ട്രിയയിൽ നിന്ന് പിറവിയെടുത്ത ചിത്രമാണ് Brothers Of The Wind.

"To learn takes courage. And to teach, patience of a mother."

💢സുന്ദരമായ വരികളാണ് മേൽ പറഞ്ഞിരിക്കുന്നത്. ഒരുപക്ഷെ സിനിമയുടെ പല സന്ദർഭങ്ങളെയും ഈ വാക്കുകളുമായി കോർത്തിണക്കാൻ സാധിക്കും. ഒരു മനുഷ്യനും പരുന്തും തമ്മിലുള്ള സഹവാസം വിചാരിക്കുന്നത് പോലെ അത്ര എളുപ്പമുള്ള കാര്യമല്ല. ഒരു വർഗ്ഗം തങ്ങളുടെ വളർച്ചക്കനുസരിച്ച് സ്വഭാവവ്യതിയാനങ്ങൾക്ക് വിധേയമായിക്കൊണ്ടിരിക്കും. അവിടെ ഈ ചിത്രത്തിന്റെ പ്രസക്തിയും ഉയരുന്നു.

💢മനോഹരമായ ഒരു ആത്മബന്ധമാണ് ചിത്രത്തിന്റെ പ്രതിപാദ്യവിഷയം. കണ്ട് പരിചിതമായതാണെങ്കിൽ കൂടി സംവിധായകന്റെ കയ്യടക്കത്തോടുകൂടിയ അവതരണം പല സന്ദർഭങ്ങൾക്കും മാറ്റേകുന്നുണ്ട്. അതിനൊപ്പം തന്നെ എക്കോളജിയിലൂടെയും അതിലെ പല കാഴ്ചകളിലൂടെ, പല സ്വഭാവങ്ങളിലൂടെ നമ്മെ കൊണ്ടുപോവുന്നുണ്ട്. അത് ചിത്രത്തെ മറ്റുള്ളവയിൽ നിന്ന് വ്യത്യസ്തമാക്കുന്ന ഒന്നാണ്.

💢സ്‌ക്രീനിൽ പതിയുന്ന കാഴ്ചകളുടെ മനോഹാരിത കണ്ടറിയേണ്ടത് തന്നെയാണ്. കണ്ണഞ്ചിപ്പിക്കുന്ന പല കാഴ്ചകളും സന്ദർഭങ്ങളോട് ഇഴുകിച്ചേരുന്ന പശ്ചാത്തലസംഗീതവും ചിത്രത്തിന്റെ മാറ്റ് കൂട്ടുന്നുണ്ട്.

🔻ＦＩＮＡＬ ＶＥＲＤＩＣＴ🔻

ഒരു സെമി ഡോക്യൂമെന്ററി എന്ന് വേണമെങ്കിൽ ചിത്രത്തെ വിശേഷിപ്പിക്കാം. മനസ്സിൽ പതിക്കുന്ന ആത്മബന്ധത്തിന്റെ കഥയാണ് ചിത്രം കൈകാര്യം ചെയ്യുന്നത്. പതിവ് രീതികളിൽ നിന്ന് മാറി human-animal relation എന്നതിനപ്പുറം പല മനോഹരമായ കാഴ്ചകളും അറിവുകളും സമ്മാനിക്കുന്നുമുണ്ട് ഈ സുന്ദരസഹവാസം. തീർച്ചയായും ഇഷ്ടപ്പെടുമെന്ന് ഉറപ്പ്.

MY RATING :: ★★★★☆

“Tonight I can write the saddest lines
I loved her, and sometimes she loved me too.”


💢പ്രശസ്ത കമ്മ്യൂണിസ്റ്റ് നേതാവും അതിലുപരി കവിയുമായ പാബ്ലോ നെരൂദയുടെ കഥയാണ് ചിത്രം കൈകാര്യം ചെയ്യുന്നത്. 1946ൽ കമ്മ്യൂണിസ്റ്റ് പിന്തുണയോടെ ഭരണം കയ്യടക്കിയ ചിലിയുടെ പ്രസിഡന്റ് അവർക്കെതിരെ തിരിയുകയും അവരെ കൂട്ടത്തോടെ അറസ്റ്റ് ചെയ്യാനുള്ള ഉത്തരവിടുകയും ചെയ്തു. ആ കൂട്ടത്തിൽ അവിടുത്തെ സെനറ്റർ കൂടിയായിരുന്ന നെരൂദയെയും അറസ്റ്റ് ചെയ്യാനുള്ള വാറന്റ് കൈമാറി. പിന്നീട് അദ്ദേഹത്തിന് ഒളിവിൽ പാർക്കലിന്റെ നാളുകളായിരുന്നു.

കമ്മ്യൂണിസ്റ്റ് ആശയങ്ങളുടെ ശക്തികേന്ദ്രമായിരുന്ന നെരൂദയെ എന്ത് വില കൊടുത്തും അറസ്റ്റ് ചെയ്യുക എന്ന ഉദ്ദേശത്തോടു കൂടിയാണ് ഭരണകൂടം ഓസ്‌കാറിനെ നിയമിക്കുന്നത്. തന്റെ ശത്രുവിനെ കൂടുതൽ അറിയുവാൻ ശ്രമിക്കുന്ന ഓസ്‌കാറിന്‌ അദ്ദേഹത്തിന്റെ കവിതകൾ വേട്ടയാടാൻ അധികം സമയം വേണ്ടിവന്നിരുന്നില്ല. അങ്ങനെ അദ്ദേഹവും നെരൂദയും തമ്മിലുള്ള അകലം ക്രമേണ കുറഞ്ഞുകൊണ്ടിരുന്നു.

💢ലോകപ്രസിദ്ധമായ കവിയും കമ്മ്യൂണിസ്റ്റുമാണ് പാബ്ലോ നെരൂദ. ചിലിയിൽ കമ്മ്യൂണിസ്റ്റ് ആശയങ്ങൾ വളർത്തുന്നതിലും അത് ജനങ്ങൾക്കിടയിൽ എത്തിക്കുന്നതിലും പ്രധാന പങ്ക് അദ്ദേഹം വഹിച്ചിരുന്നു. ഒടുവിൽ കമ്മ്യൂണിസ്റ്റ് ഭരണകൂടം അധികാരത്തിലെത്തിയപ്പോൾ അവരുടെ കൈത്താങ്ങായി നിന്നതും നെരൂദയായിരുന്നു. അത്തരത്തിൽ പ്രശസ്തിയാർജ്ജിച്ച വ്യക്തിയുടെ ജീവിതത്തിലെ ഒരു സുപ്രധാന കാലഘട്ടമാണ് ചിത്രം കാട്ടിത്തരുന്നത്.

💢കവിതകൾ കൊണ്ട് ജനമനസ്സുകളെ കീഴടക്കിയിരുന്ന നെരൂദയെ കണ്ടെത്താനായി ഓസ്കാർ എന്ന ചെറുപ്പക്കാരൻ പോലീസ് ഉദ്ധ്യോഗസ്ഥൻ നിയമിക്കപ്പെടുന്നതും അദ്ദേഹത്തെ കൂടുതൽ അടുത്തറിയുന്നതിലുമൂടെ ചിത്രം മുന്നോട്ട് പോവ്വുന്നു. ഒരു ക്യാറ്റ് & മൗസ് ജയിൻ പോലെ തോന്നിപ്പിച്ചേക്കാമായിരുന്ന കഥ, പക്ഷെ ഒരിക്കൽ പോലും പിടിച്ചിരുത്തുന്നതായി തോന്നിയില്ല. മാത്രമല്ല കമ്മ്യൂണിസ്റ്റ് നേതാവ് എന്നതിലുപരി ഒരു കവിയായി മാത്രമാണ് അദ്ദേഹത്തെ ചിത്രീകരിച്ചിരിക്കുന്നതും. അതുകൊണ്ട് തന്നെ വിപ്ലവത്തിന്റെ ചൂട് ഒരിക്കൽ പോലും അനുഭവിക്കാൻ സാധിക്കുന്നില്ല നെരൂദയിൽ.

💢നെരൂദയായി Luis Gneccoയുടെ ഗംഭീര പ്രകടനമാണ് ചിത്രത്തിന്റെ നെടുന്തൂണായി പലപ്പോഴും തോന്നിയത്. പലപ്പോഴും സന്ദർഭങ്ങൾക്ക് ജീവൻ കൊടുക്കാൻ അദ്ദേഹത്തിന്റെ ശൈലികൾക്ക് സാധിക്കുന്നുണ്ട്. അദ്ദേഹത്തിന്റെ ചില പ്രത്യേക സന്ദർഭങ്ങളിലുള്ള ചെയ്തികൾ ആദ്യം മടുപ്പ് അനുഭവിപ്പിക്കുന്നതും ശേഷം ആലോചിക്കുമ്പോൾ തൃപ്തികരമായി തോന്നുകയും ചെയ്തു. എങ്കിലും ആദർശധീരനായ ഒരു നേതാവിൽ നിന്നും ഇങ്ങനെയൊക്കെ പ്രതീക്ഷിക്കാമോ എന്ന ചോദ്യം പലപ്പോഴും മനസ്സിൽ ഉണർന്നു.

🔻ＦＩＮＡＬ ＶＥＲＤＩＣＴ🔻

കൈകാര്യം ചെയ്യുന്ന വ്യക്തിയുടെ ജീവിതത്തെ പറ്റി യാതൊരു ആമുഖവുമില്ലാതെ നേരിട്ട് കഥ പറയുന്ന കാലഘട്ടത്തിലേക്ക് കടക്കുന്നത് നല്ലൊരു നീക്കമായി തോന്നിയില്ല. അതുതന്നെയാണ് ആസ്വാദനത്തെ പിന്നോട്ട് വലിച്ച ഘടകവും. 89ആം ഓസ്കാറിലേക്ക് ചിലിയുടെ ഒഫിഷ്യൽ എൻട്രി ആയിരുന്ന ചിത്രം ശരാശരി സംതൃപ്തി നൽകി അവസാനിക്കുന്ന ഒന്നായി മാറി.

MY RATING :: ★★★☆☆

"അടിച്ചമർത്തിയാൽ വായടച്ചിരിക്കുകയല്ല.പ്രതിഷേധിക്കുകയാണ് വേണ്ടത്."


🔻ＳＴＯＲＹ ＬＩＮＥ🔻

പാസ്സ്പോർട്ടിലെ ചില ഇഷ്യൂസ് കാരണം തന്റെ രാജ്യത്തേക്ക് തിരികെ പോവാൻ പറ്റാതെ വിഷമിച്ച് എയർപോർട്ടിൽ ഇരിക്കുകയാണ് മർജാൻ.ഒരു സിഗരറ്റും വലിച്ച് സോഫയിൽ ഇരിക്ക്മ്പോൾ അവൾക്ക് ഓർമ്മ വന്നത് തന്റെ കുട്ടിക്കാലമാണ്.
ഇസ്‌ലാമിക വിപ്ലവം നടക്കുന്നതിന് മുമ്പ് ജനിച്ച്, അപ്പോഴുണ്ടായിരുന്ന നീചഭരണത്തിനെതിരെ നിലകൊണ്ട തന്റെ കുടുംബത്തെ കണ്ടാണ് മർജാൻ വളർന്നത്.ശേഷം രാജ്യത്തൊട്ടടങ്കം വിപ്ലവത്തിന്റെ കാറ്റ് വീശി, ഇസ്‌ലാമിക ഭരണം നിലകൊണ്ടപ്പോൾ ഏവരും സന്തോഷത്തിലായിരുന്നു.എന്നാൽ അതൊരു അടക്കിഭരിക്കലിന്റെ വക്കിലെത്താൻ അധികം സമയം വേണ്ടിവന്നില്ല.

ഭരണാധികാരികളുടെ ഇഷ്ടത്തിനനുസരിച്ച്, പ്രജകൾക്ക് മീതെ കടിഞ്ഞാണിടാനുള്ള മാർഗ്ഗം മാത്രമാക്കി മതത്തെ വളച്ചൊടിച്ചപ്പോൾ നഷ്ട്ടപ്പെട്ടത് പലരുടെയും സ്വപ്നങ്ങളാണ്.ഒരു ഭീതിയോടെയല്ലാതെ സ്ത്രീകൾക്ക് തെരുവിലേക്കിറങ്ങാൽ കഴിയുമായിരുന്നില്ല.സ്വന്തം ജീവനിൽ കൊതിയുണ്ടായിരുന്നതിനാൽ ആരും അതിനെ ചോദ്യം ചെയ്യാൻ മുതിർന്നതുമില്ല.അവിടെയാണ് മർജാൻ പ്രതിഷേധത്തിന്റെ പ്രതീകമായി ഉയർന്ന് നിന്നത്.

ഒരു രാജ്യത്തിന്റെ നെറികെട്ട അവസ്ഥയുടെ തുറന്നെഴുത്ത് തന്നെയാണ് മർജാനിന്റെ നോവലും ഈ ചിത്രവും.മതം നൽകുന്ന സ്വാതന്ത്ര്യവും അവകാശങ്ങളും പൂർണ്ണമായി നിഷേധിച്ച്, രാജ്യത്തിന്റെ പൗരന്മാരെ തങ്ങളുടെ ചൊൽപടിക്കനുസരിക്ക് നിർത്താൻ വെമ്പൽ കൊള്ളുന്ന ഭരണകൂടം നിലനിൽക്കുമ്പോൾ അവ അനുസരിച്ച് മിണ്ടാതെ നിൽക്കുകയല്ല, പകരം പ്രതിഷേതാഗ്നി ഉയർത്തി അതിനെതിരെ പോരാടുകയാണ് വേണ്ടത്.എന്നാൽ ഒരു വ്യക്തി വിചാരിച്ചത് കൊണ്ട് ഒരു മാറ്റവും കൊണ്ടുവരാൻ സാധ്യമല്ല.ഒരു സമൂഹം തന്നെ അതിനായി ഇറങ്ങിപ്പുറപ്പെടണം.

ഒരു Coming Of Age എന്ന നിലയിൽ സിനിമ ചർച്ച ചെയ്യുന്ന കാര്യങ്ങൾ വേറെയുമുണ്ട്.ഇറാനിൽ നിന്ന് പഠനാവശ്യത്തിനായി ഫ്രാൻസിലേക്ക് ചേക്കേറുന്ന മർജാന് പലപ്പോഴും അവിടുത്തെ ചെയ്തികൾ സ്വീകാര്യമായിരുന്നില്ല.രണ്ട് രാജ്യങ്ങളുടെ സംസ്കാരങ്ങൾ തമ്മിലുള്ള അന്തരം വളരെ വ്യക്തമായി വരച്ചുകാട്ടുന്നുണ്ട് ചിത്രം.കൂടെ പലവിധ ചിന്തകളിലും മാനസികസംഘർഷങ്ങളിലും ഉഴലുന്ന കൗമാരക്കാരിയെ മർജാനിൽ ദർശിക്കാൻ സാധിക്കും.

മികച്ച ആനിമേഷൻ സിനിമക്കുള്ള ഓസ്കാർ നോമിനേഷൻ ലഭിച്ച ചിത്രം മികച്ച അനുഭവമാണ് എന്ന കാര്യത്തിൽ സംശയമില്ല.

🔻ＭＵＳＩＣ & ＴＥＣＨＮＩＣＡＬ ＳＩＤＥＳ

വളരെ മികച്ച് നിൽക്കുന്ന സംഗീതം വ്യത്യസ്ത ചേരുവകളാൽ സമ്പന്നമാണ്.സന്ദർഭത്തിനനുസരിച്ച് പാർട്ടി മ്യൂസിക്കും കൂടെ വിപ്ലവം നിറക്കുന്ന പശ്ചാത്തലസംഗീതവും ഗംഭീര വിഷ്വൽസും അടങ്ങി സിനിമയുടെ ഉള്ളടക്കത്തിന് പൂർണ്ണ പിന്തുണ നൽകുന്നു ഇവയെല്ലാം.

🔻ＦＩＮＡＬ ＶＥＲＤＩＣＴ🔻

ഇറാനിയൻ സിനിമകൾ ഭൂരിഭാഗവും കൈകാര്യം ചെയ്യുക ആഭ്യന്തരപ്രമേയങ്ങൾ തന്നെയാണ്.സ്വന്തം രാജ്യത്തെ മറ്റുള്ളവർക്ക് മുന്നിൽ അവതരിപ്പിക്കുക എന്ന കർത്തവ്യം വളരെ മികച്ച രീതിയിൽ അവ കൈകാര്യം ചെയ്യാറുമുണ്ട്.അതെ തലത്തിൽ തന്നെ രാജ്യത്തിന്റെ ആഭ്യന്തരപ്രശ്നങ്ങൾ പ്രധാന ഉള്ളടക്കമാക്കി കഥ പറഞ്ഞ്, കേന്ദ്രകഥാപാത്രത്തെ ഒരു മാത്രകയാക്കി പ്രതിഷ്ഠിച്ചിരിക്കുന്നു നമുക്ക് മുന്നിൽ.അനുഭവിച്ചറിയേണ്ട ചിത്രത്തിന്റെ കൂട്ടത്തിൽ Persapolisഉം ചേക്കേറുന്നു.

MY RATING :: ★★★★☆

"God gave us relatives.Thank God we can choose our friends"

"47 വർഷങ്ങൾക്ക് ശേഷമുള്ള ഈ ഫോണ്കോള് ഒരു മടക്കയാത്രക്കുള്ള തുടക്കമാണ്.അത്രതന്നെ വർഷങ്ങൾ മുമ്പുള്ള ഓർമകളിലേക്ക്.എന്റെ പഴയ വീട്ടിലേക്ക്.അവനിലേക്കും"

"അടച്ചുപൂട്ടലിന്റെ വക്കിലെത്തി നിന്നപ്പോഴാണ് ഇവർ പത്ത് പേരും പഠിക്കാൻ സന്നദ്ധരായി ഞങ്ങൾക്ക് മുന്നിലെത്തിയത്.ഇനി ഇവരാണ് സ്‌കൂളിന്റെ യശസ്സ് ഉയർത്താൻ ഞങ്ങൾക്ക് മുന്നിലുള്ള മാർഗം"

🔻Story Line🔻
1970കളിലെ ഒരു പാഠ്യവർഷത്തിന്റെ തുടക്കം.എല്ലാ സ്‌കൂളുകളിലും കുട്ടികൾ പുതിയ ഉടുപ്പുകളും പുസ്തകങ്ങളുമായി സന്തോഷത്തോടെ ഒത്തുകൂടുന്ന സുദിനം.അങ്ങനെ എല്ലായിടത്തും സന്തോഷം അലയടിക്കുമ്പോൾ ഒരിടത്ത് മാത്രം സ്ഥിതി മറിച്ചായിരുന്നു.മുഹമ്മദിയ്യ എലമന്ററി സ്‌കൂളിൽ.
ഒരുകാലത്ത് പേരുകേട്ട സ്കൂളായിരുന്നു മുഹമ്മദിയ്യ.എന്നാൽ ഓരോ വർഷം കഴിയുന്തോറും മറ്റ് മുന്തിയ സ്‌കൂളുകൾ ഓരോന്നായി പ്രവർത്തനം ആരംഭിക്കുന്തോറും മുഹമ്മദിയ്യയിൽ കുട്ടികളുടെ കൊഴിഞ്ഞ് പോക്ക് ഗണ്യമായി കൂടിക്കൊണ്ടിരുന്നു.ഒടുവിൽ സ്‌കൂൾ പൂട്ടാൻ സർക്കാർ പ്രഖ്യാപിച്ചെങ്കിലും ഒരു ഇളവ് കൊടുത്തിരുന്നു. പത്ത് കുട്ടികൾ ഉണ്ടെങ്കിൽ സ്‌കൂൾ തുറന്ന് പ്രവർത്തിക്കാം.
പിന്നെ അതിനുള്ള തത്രപ്പാടിലായിരുന്നു എല്ലാവരും.ടീച്ചർ മുസ്ലിമയും ഹർഫാനും കിണഞ്ഞ് പരിശ്രമിച്ച് പത്ത് കുട്ടികളെ അവസാനം സ്‌കൂളിലേക്ക് കൊണ്ടുവന്നു.പഠിക്കാൻ യാതൊരു സാഹചര്യവും സാമ്പത്തികവും ഇല്ലാത്ത, എന്നാൽ കുറെ ആഗ്രഹങ്ങളും സ്വപ്നങ്ങളും ഉള്ള കുട്ടികൾ.തുടർന്ന് അവരുടെ സ്‌കൂൾ ജീവിതവും അധ്യാപകരുമായുള്ള മാനസിക അടുപ്പവും സൗഹൃദവും രസകരമായ കുറച്ച് സംഭവങ്ങളിലുമൂടെ കഥ വികസിക്കുന്നു.
🔻Behind Screen🔻
യഥാർത്ഥ സംഭവങ്ങളാണ് ചിത്രത്തിന്റെ ആധാരം.Andrea Hirata എഴുതിയ ഇതേ പേരിലുള്ള നോവൽ ആസ്പദമാക്കി Riri Riza സംവിധാനം ചെയ്ത ചിത്രമാണ് Laskar Pelangi. വളരെ ശ്രദ്ധയും ഗൗരവവും അർഹിക്കുന്ന വിഷയം തന്റെ സിനിമക്ക് വേണ്ടി തിരഞ്ഞെടുത്തതിൽ സംവിധായകൻ അഭിനന്ദനം അർഹിക്കുന്നു.ബെലിടങ് ഐലന്റിലെ സർക്കാർ സ്കൂളുകളുടെയും മതപഠനസ്‌കൂളുകളുടെയും യഥാർത്ഥ അവസ്ഥ തുറന്ന് കാണിക്കുകയായിരുന്നു സംവിധായകന്റെയും കൂടെ അണിയറയിൽ പ്രവർത്തിച്ചവരുടെയും ലക്ഷ്യം.
മുഹമ്മദിയ്യ സ്‌കൂളിലെ അധ്യാപകരെയും പത്ത് കുട്ടികളെയും കേന്ദ്രീകരിച്ചാണ് കഥ മുന്നോട്ട് പോവുന്നത്.സത്യത്തിൽ സിനിമ കണ്ടപ്പോൾ നമ്മുടെ സർക്കാർ സ്‌കൂളുകളുടെ അവസ്ഥയാണ് മനസ്സിൽ തെളിഞ്ഞത്.നിരവധി സർക്കാർ സ്‌കൂളുകൾ നാട്ടിലുള്ളപ്പോഴും ഉയർന്ന സിലബസുകളിൽ കാശ് മുടക്കി പഠിപ്പിക്കാൻ വെമ്പൽ കൊള്ളുന്ന മാതാപിതാക്കളും ആയതിനാൽ ഗണ്യമായി എണ്ണകുറവ് ഉണ്ടാവുന്ന സർക്കാർ സ്‌കൂളുകളും നമ്മുടെ മുന്നിലുണ്ട്.ഈ കാലഘട്ടത്തിൽ അത്തരം സ്കൂളുകളോട് സമൂഹത്തിന് എന്തോ അവജ്ഞയാണ്.ആ പൊതുബോധത്തെ പൊളിച്ചുകാട്ടാനാണ് സംവിധായകൻ ശ്രമിച്ചിരിക്കുന്നത്.കൂടാതെ ജനങ്ങളുടെ ശ്രദ്ധയിൽ പെടുത്താനും.
നമ്മുടെ സർക്കാരിന്റെ ഇമേജ് ഉയർത്തുന്നതിന് പൂട്ടാറായ സ്‌കൂളുകളെ ഏറ്റെടുത്ത് പ്രവർത്തിപ്പിച്ചത് വഹിച്ച പങ്ക് വളരെ വലുതാണ്.പഠിക്കാൻ ആഗ്രഹമുണ്ടായിട്ടും അതിന് യോജിച്ച സന്ദർഭങ്ങളോ പിന്തുണയോ ലഭിക്കാത്ത നിരവധി കുട്ടികൾ നമ്മുടെ നാട്ടിലുണ്ട്.അത്തരത്തിലുള്ളവർക്ക് ആശ്വാസം എന്നും സർക്കാർ വക സ്‌കൂളുകളും സ്ഥാപനങ്ങളും തന്നെയാണ്.സൗജന്യവും നല്ല രീതിയിൽ ശിക്ഷണവും ലഭിക്കുന്ന സ്‌കൂളുകൾ കണ്മുന്നിലുള്ളപ്പോഴും കാശ് മുടക്കി പഠിപ്പിക്കുന്നത് സ്റ്റാറ്റസിന്റെ ഭാഗമായി കൊണ്ടുപോവാൻ ശ്രമിക്കുന്ന മാതാപിതാക്കൾ ഒരുതരത്തിൽ മറ്റുള്ളവർക്ക് വളംവെക്കുകയാണ്.അവരോടുള്ള മുഖംതിരിവും സംവിധായകൻ പറഞ്ഞുവെക്കുന്നു.
കഥാപാത്രസൃഷ്ടികളും കഥാസന്ദർഭങ്ങളും വളരെ ഹൃദയവും രസകരവുമാണ്.സ്‌കൂളിലെ ഓരോ കുട്ടികൾക്കും അവരുടെതായ വിനോദങ്ങളും കഴിവുകളുമുണ്ട്.അവയൊക്കെയും കാണിക്കുമ്പോൾ ഒരു പുഞ്ചിരി നമ്മിൽ നിറക്കുന്നുണ്ട് ചിത്രം.എന്നാൽ സിനിമ കണ്ടുകഴിഞ്ഞപ്പോൾ മനസ്സിൽ ഒരു വിങ്ങലാണ് അവശേഷിച്ചത്.
ഈ ചിത്രത്തിന്റെ പല ലൊക്കേഷനുകളും Bangk Belitung ഗവർണ്മെന്റ്റ് ടൂറിസ്റ്റ് സെൻറ്ററുകളായി പ്രഖ്യാപിച്ചിരുന്നു.മുഹമ്മദിയ്യ എലമന്ററി സ്‌കൂളിന്റെ പുതുക്കിപ്പണിയലിനും പഠനാവശ്യങ്ങൾകുമായുള്ള തുക കണ്ടെത്താനായിരുന്നു അത്.വളരെയേറെ ഗുണം ചെയ്ത ഒരു തീരുമാനം.ടൂറിസ്റ്റുകളുടെ കുത്തൊഴുക്ക് തന്നെയായിരുന്നു പിന്നീട് ആ ലൊക്കേഷനിലേക്ക്.
വളരെ ലളിതമായ ആവിഷ്കാരവും മനസ്സിൽ തങ്ങിനിൽക്കുന്ന കഥാപാത്രങ്ങളും കഥയും മനോഹരമായ ഈ കൊച്ചുചിത്രത്തിന്റെ ഭംഗിയാണ്.ഇന്തോനേഷ്യൻ ബോക്‌സ് ഓഫിസിൽ പണം വാരിയ ചിത്രങ്ങളുടെ പട്ടികയിൽ ആദ്യ സ്ഥാനങ്ങളിലൊന്ന് ചിത്രത്തിന് സ്വന്തം.ഒരുപോലെ പ്രേക്ഷക ശ്രദ്ധയ നേടുവാനും അധികാരികളുടെ കണ്ണു തുറപ്പിക്കാനും ചിത്രത്തിന് സാധിച്ചിട്ടുണ്ട്.
🔻On Screen🔻
ചിത്രത്തിലെ കാസ്റ്റിങ് ഗംഭീരമാണ്.ബെലിടങ് തെരുവുകളിൽ കളിച്ച് വളർന്ന കുട്ടികളെ തന്നെയാണ് പത്ത് വിദ്യാർഥികളുടെ വേഷം കൈകാര്യം ചെയ്യാൻ ഏൽപ്പിച്ചത്.തികച്ചും സ്വാഭാവികമായ അഭിനയം കൊണ്ട് മനസ്സിൽ ഇടം പിടിക്കുന്നു എല്ലാവരും. പല നേരങ്ങളിലും ചിരിപ്പിക്കുവാനും വിഷമത്തിലാഴ്ത്തുവാനും അവർക്ക് സാധിച്ചു.അധ്യാപകരുടെ കഥാപാത്രങ്ങൾ ചെയ്തവരും തങ്ങളുടെ വേഷങ്ങൾ ഭംഗിയാക്കി.
🔻Music & Technical Sides🔻
വളരെ ലളിതമാണ് പശ്ചാത്തലസംഗീതം.അതും ആവശ്യമുള്ള സന്ദർഭങ്ങളിൽ മാത്രമേ ഉപയോഗിച്ചിട്ടുള്ളൂ.വളരെ റിയലിസ്റ്റിക്കായ ക്യാമറയും ചിത്രത്തിന് ജീവൻ നൽകാൻ സഹായിച്ചിട്ടുണ്ട്. കളർ ഗ്രേഡിങ് പഴയ കാല ഫീൽ നൽകുവാൻ പാകത്തിന് ഇണങ്ങി നിന്നു
🔻Awards & Nominations🔻
Bandung ഫിലിം ഫെസ്റ്റിവലിലും ഇന്തോനേഷ്യൻ ഫിലിം ഫെസ്റ്റിവലിലും മികച്ച ചിത്രത്തിനുള്ള പുരസ്കാരം കരസ്ഥമാക്കിയപ്പോൾ International Children & Young Adults Film festivalൽ ഗോൾഡൻ ബട്ടർഫ്‌ളൈ അവാർഡും Udine Far East International Film Festivalൽ ഓഡിയൻസ് അവാർഡും ചിത്രം കരസ്ഥമാക്കി.
🔻Final Verdict🔻
തീർത്തും പ്രാധാന്യവും ആനുകാലിക പ്രസക്തിയുള്ളതുമായ ഒരു വിഷയം കൈകാര്യം ചെയ്ത് കയ്യടി നേടിയ സംവിധായകൻ.നമ്മുടെ നാട്ടിലെ സ്‌കൂളുകളുടെ അതേ അവസ്ഥ തന്നെ സ്ക്രീനിൽ കാണുമ്പോൾ എന്തെന്നില്ലാത്ത ഒരു വിഷമമോ വിങ്ങളോ മനസ്സിൽ തങ്ങിയേക്കാം.വളരെ തന്മയത്വത്തോടെ ലളിതവും എന്നാൽ ഗൗരവത്തോടെയും ആ വിഷയത്തെ സമീപിച്ചതിൽ സംവിധായകൻ പൂർണമായും വിജയിച്ചിട്ടുണ്ട്.ഒരുപോലെ പ്രേക്ഷകശ്രദ്ധയും അധികാരികളുടെ ശ്രദ്ധയും പിടിച്ചുപറ്റിയ ചിത്രം മികച്ച ഒരു സൃഷ്ടി തന്നെ.
My Rating :: ★★★★☆